Par vardivkom

Nu suokuma dzeivuo tik moza daļa vardivku, tok ar kotru godu jūs daudzums pīsajēme vairumā. Tai, sekojūt zalta komuleišam dabasu bļūdā, kluotyn zīdu plaukumā atguojuse beja Vosora. Jei tik tikū sasameinē ar bruoli Pavasari. Vosora prīcē vysu dzeivū radeibu, i nivīnu jei naapdalē ar sovu syltū, saulainū smaidu. Muorkā vysi prīcuojuos i gavilē prīkā, jo vysi beja nūsoluši nu īilgušuos zīmys. Deļ tuo niule varē mauduotīs i sauļuotīs cik teik. Vardivu nūstyurī beja īsastuojs rīkstu laiks. Tys ir taids laiks, kod var juodelēt vīns iz ūtra kukaraguos, i tod piečuok maleņā muorceņš ryupiejuos par jaunū paaudzi – kurkulānim. Vysi muorka īdzeivuotuoji prīcuojās par itū nūtykumu. Sagaidūt attīceigū mieneša seju i kieneņa leidakys pīkrišonu, vardivkys spruka juozdeleit. Vīna iz ūtrys. Vīna iz ūtrys. Kod tyss vyss apnyka i lykuos garlaiceigs, vardiveitis izdūmuo jaunu jūku. Izaruod, ka var juozdeleit pa četri. Kod apneik prīkšā stuovūšuos mugorys, tod var uzdoncuot plauksteņpolku i pasameineit ar danču kompanjonim. Tai vardivis turpynuo sovys ļustis leidz pazuda jūs izslavātuo uzvedeibys kontrole. Tyka grīzti gon valši, gon fokstroti, i tautu dejis i braziļu sambys. Jau nabeja svareigs partners - voi tys beja sābrs, voi juo sīva. Tai jau iraida. Ka naredzi golu balleitei, jei puorsavierš par lavīnu, daže tepat iz mozuokīm kolnim.Zinis, patīsys juos voi nā. Ar pīaudziejumim, voi bez. Juos izaplota mudruok par lopu plaukšonu. Tū vysu bardaku, kas nūteik ūtra muorka molā, dazynuo ari pats muorka kieneņš leidaka. Kieneņš sasauce sovu vaļdeibys padūmi i, uzrokstūt petīceju, syutē ziņnesi karasi iz ūtru muorka golu pi vardivem. Aizdavums beja vīns – īzarast vītā, nūskaiteit leidakys pavieli ar pavieli izbeigt leidzšinejū juozdeleišonu i cytys navālamys darbeibys, kas varē apdraudeit muorceņa eksistenci. Ziņness karass īkuope sovūs rotūs i nūbrauce. Proguo sutka. Nu karaša ni viests, ni poša atpakaļ. Proguo divejis. Tys pats. Muorka kieneņš beja tiuli izmisumam, jo juta, ka vara jam izsleid nu prīkšejuom spurom.Pa tū laiku, kod kieneņa pilī dūmuo jaunu planu, vardivis sovu realizē gūdam. Vysys prīcys rezuļtatā kurkuļu recekli auga augumā i pletēs plašumā. Tys vysim īdzeivuotuojim draudē ar itūs recekļu aizareišonu, īšonu pūstā i puorsavieršonu par dyuni. Tai jau beja nūsaticīs ar mozajīm tritonim. Bet jī lelys suopis napajuta, jo tys nūtyka ar jīm mīgā.Leidz kieneņam atguo zinis, ka ziņnešam karašam tyka sasūleiti lobumu lobumi, i jis na tik nav piļdiejs pavieli, tok gaužam ūtraiži - palics i nūsastuojs vardivu pusē. Tai, vot, īlaists pūsts napalīk mozuoks. Jis taisiejuos aizviņ leluoks, īskuove i pazudynuo sovā ceļā vysu. Piec tuo palyka puori viņ sasmirdiejušuo dyune. Kurkuļu receklis vēlēs natraucādams iz prīšku. Pošys vardivis, saprotušys sovu izdareitū nalaimi, laide ļakačuot prūm nu muorka. Juos cerē pasasliept sūpluok mozajā upeitē. Puorejī muorka īdzeivuotuoji navarē aizbēgt nikur. Jo, ja tev depeišu i kuoju vītā spurys, tu navari nūskrīt, nūbēgt nikur.Recekļainīs komuls beja sasnīdzs naaprokstomus lelumus i strauji tyvuojuos kieneņa pilei, draudādams i jū saberzt putekļūs. Naleidzē ni vītejīuo karaspāka īsajaukšona, na cereituo smognejuo paleidzeiba nu uorpasauļa. Kurkuļu receklī namanē nikaidys dzeiveibys pazeimis. Mozī, malnī punkteņi, kas beja kurkulāni, tī nu lelajīm grākim, ļustem i nauzmaneibys beja jau myruši. Naatgrīzeniskīs process kliva nanūvieršams. Receklis izspīde kieneņa piļs aizsorgvaļņus, durovys, lūgus, nūgubejūt vysu, kas truopiejuos ceļā. Tuoļuok sekuo kieneņa apartamenti. Lela i trauksmaina ceiņa nūtyka storp jīm obejim divejim. Beigu beiguos kieneņš aizareisteidami vamdams atpakaļ, raugūt apēst vysus malnūs punkteņus, nūmyra. Nūmyra ari vyss muorks. Piečuok jam leikumu mete ari peilis, pelikāni i starki. Proguo daudzi godu nu ituo tragiskuo nūtykuma, tok runys jūprūjom kleida apleik kai gadi. Nikur tuoli nabeja nūguošys. Tūmār, lai cik laiski vardeitis ļakačuo prūm, juos lobu golu najēme. Tyka mozu puiškinu rūkuos. Jī veļ beja iz pasauļa eksperimentu tokys i lobpruot ar salmenim sapyute gaisu vardivkom čūkstā.Tai tūmār goduos. Lai ari nu suokums mozs i naīvārojams ruodīs kaids misiekls voi grieceņš, tys beiguos var apēst vysus. I pošu tevi. Ja ni nu uorys, tod nu īkšys gon.